Tariki 17 Kanama 2024, mu Mudugudu wa Nyabuhoro mu Kagari ka Busoro hari kubera ku rwego rw'Akarere umuganda wihariye w'urubyiruko. Ubuyobozi n'urubyiruko rwo mu Murenge wa Kayumbu bafatanyije gutunganya ikibuga cya Kaduha bityo abatuye iki gice bakazabona aho kwidagadurira hagutse kandi hameze neza.
Umuyobozi w’Akarere Dr. Nahayo Sylvere ari kumwe n’Umuyobozi wa Polisi mu Mirenge ya Musambira na Kayumbu, Umuhuzabikorwa w’urwego DASSO Wungirije mu Karere, Umuyobozi w’Umurenge wa Kayumbu bifatanye n’urubyiruko rw’uyu Murenge.

Uyu muganda w'urubyiruko wibanze mu rusange ku gufata neza ibikorwaremezo, kubakira abatishoboye no gutunganya ibibuga by’imikino.
Umuganda Wakozwe mu Mirenge yose uri muri gahunda y'ibikorwa byateguwe mu rwego rwo kwizihiza Umunsi Mpuzamahanga w'Urubyiruko. Uyu mwaka insanganyamatsiko iragira iti"Ikoranabuhanga mu Rubyiruko, Inzira yo Kwihutisha Iterambere Rirambye".
Hatanzwe kandi ikiganiro ku bitabiriye umuganda cyagarutse ku bikorwa bizibandwaho muri uku kwezi kwahariwe kwizihiza umunsi mpuzamahanga w’Urubyiruko.