Umuryango RICH arirwo rugaga rw'amadini n'amatorero mu kubungabunga ubuzima, urasaba ko ubufatanye bw'abafatanyabikorwa n'izindi nzego mu kurwanya indwara ya Malariya bwahoraho kuko nibyo bizatuma abandura iyi ndwara barushaho kugabanuka. Ibi ni ibyatangajwe na bwana KANEZA Narcisse umukozi muri uyu muryango mu nama y'ihuriro n'abafatanyabikorwa b'Akarere yateranye kuri uyu wa gatatu tariki 26 Gicurasi 2021 ku Ruyenzi mu Murenge wa RUNDA.

Iyi nama y'inteko rusange ya JADF iteganywa n'itegeko, aho abafatanyabikorwa baba bagomba kwica bakaganira ku ruhare rwabo mu gufasha Akarere mu iterambere by'umwihariko mu gufasha umuturage gutera intambwe no kwivana muri bimwe mu bibazo by'ubuzima, hashingiwe ku mishanga bagenda bakora ku bufatanye n'ubuyobozi bw'Akarere.

Ku ruhande rw'umuryango RICH, bavuga ko bakomeje gahunda yabo y'ubufatanye n'ubuyobozi mu mibereho myiza y'abaturage, by'umwihariko mu kurwanya no gukumira ihohoterwa mu muryango ndetse no kunganira Akarere mu bukangurambaga bwo kurwanya indwara ya Malariya. Bwana KANEZA Narcisse wari uhagarariye umuryango RICH muri iyi inama yagejeje ku bafatanyabikorwa bagenzi be ibyo bakoze mu kurwanya indwara ya Malariya binyuze mu kwigisha abaturage.

Ashingiye kuri iki cyegeranyo yasabye bagenzi guhora buri gihe batekereza ko malariya nayo ari imwe mu ndwara zibangamiye umuryango nyarwanda bityo ko basabwa gufatanya kuyikumira. Narcisse KANEZA yagize ati" kwigisha ni uguhozaho kandi birashoboka twese nidusenyera umugozi umwe. Mu nama duhuriramo n'abaturage bitewe n'ibikorwa dukora ntabwo byatubuza gutambutsamo ubutumwa bwo kwirinda Malariya nkuko tubikora dutambutsa ubutumwa bwo gukumira icyorezo cya Covid-19. Turasabwa rero ubufatanye bukomatanyije kuko nibyo bizatuma malariya tuyihashya mu miryango iwacu".

Abitabiriye iyi nama nabo basanga koko kurwanya Malariya ndetse n'izindi ndwara baramutse babigizemo uruhare byatanga umusaruro ufatika. Dr JARUBU Theogene Umuyobozi Mukuru w'ibitaro bya Remera Rukoma avuga ko hari imiryango inyuranye igenda yunganira inzego z'ubuvuzi mu kurwanya Malariya n'izindi ndwara. Avuga ko nk'inzego z'ubuvuzi nabo bazakomeza kwigisha abaturage uburyo bwo kwirinda Malariya burimo gukoresha neza inzitiramubu, gutema ibihuru no gukuraho ibidendezi by'amazi bikikije aho batuye kuko ariho imibu itera malariya yororokera.

Umuyobozi w'Agateganyo w'Akarere ka KAMONYI bwana TUYIZERE Thaddee, yashimiye uruhare rw'iyi miryango inyuranye yaba iy'imbere mu gihugu ndetse n'indi mpuzamahanga mu gufasha Akarere mu iterambere, binagendanye n'izi gahunda zo kwirinda Malariya n'izindi ndwara z'ibyorezo. Uyu muyobozi yijeje abafatanyabikorwa ubufatanye mu rugamba rwo gukomeza gufasha umuturage mu nzira y'imibereho myiza n'iterambere ritajegajega.