Tariki 17 Kamena 2025, ku bufatanye n’Ikigo cy’Ibarurishamibare (NISR) ku Karere habereye inama nguranabitekerezo ku ishusho y’Akarere ka Kamonyi ku byavuye mu bushakashatsi bwa karindwi ku mibereho rusange y’ingo mu Rwanda (EICV7), bwakozwe na NISR.

Ibiganiro byari byatumiwemo inzego zihagarariye abaturage mu byiciro byose, basuzumira hamwe icyakorwa mu rwego rwo kugabanya ibipimo by’ubukene mu Karere.  Inama yayobowe n’Umuyobozi Mukuru wa NISR bwana MURENZI Ivan ari kumwe n’Umuyobozi w’Akarere Dr. NAHAYO Sylvere. Hari kandi Abayobozi b’Akarere bungirije, Abakuriye inzego z’umutekano mu Karere, Inama Njyanama y’Akarere n’ibindi byiciro.
 

Muri iyi nama ibi byiciro bihagarariye abandi byari byatumiwe byiyemeje ko habaho gukora ibishoboka byose ubukene bukagabanuka mu Karere. Ibi bizashingira ku guhuza ab’amikoro make n’amahirwe y’imirimo ahari, gukurikirana ko inkunga bagenerwa bayikoresha neza kandi ubuyobozi bugakomeza gukora ubukangurambaga bugamije gushishikariza abaturage kurushaho guharanira imibereho myiza n’iterambere ryabo.