Muri gahunda y’umushinga Green AMAYAGA ugamije kongera kugaruka ubuhehere buturutse ku rusobe rw’ibimera n’ibindi binyabuzima mu Mirenge ya Mugina, Rugalika, Musambira na Nyarubaka, mu Murenge wa Rugalika i Kigese habereye igikorwa cyo gutanga amatungo magufi (ingurube 60) ku miryango imwe yo mu kicyiro cya mbere cy’ubudehe. Iyi gahunda igamije gufasha iyi miryango kuva mu bukene no kubashishikariza gutanga umusanzu wabo mu kurengera ibidukikije.

Gahunda yitabiriwe na VM Ushinzwe ubukungu bwana NIYONGIRA Uzziel, hari kandi Umuyobozi mukuru muri Minisiteri y’Ubutegetsi bw’Igihugu ushinzwe kwegereza abaturage ubuyobozi bwana GAKIRE Bob, Umuhuzabikorwa w’ Umushinga wa Green Amayaga muri REMA bwana SONGA Remy, Umuhuzabikorwa wa APEFA bwana NDERA Jackson.

Umuyobozi w’Akarere Wungirije ushizwe Iterambere ry’Ubukungu bwana NIYONGIRA Uzziel,yashimiye Ikigo cy’igihugu cyita ku bidukikije REMA ndetse n’abandi bafatanyabikorwa bayo mu gushyira mu ngiro imishinga iteganyijwe muri Green Amayaga Project. Uyu muyobozi yavuze ko aya matungo magufi azunganira iyi miryango bityo abayigize bityo batandukane n’ubukene biteze imbere. Yasabye abahawe izi ngurube kuzifata neza kugirango zizabashe kubateza imbere kandi bakaba bagomba kuzoroza bagenzi babo.

Muri uyu mushinga Green Amayaga hazatangwa mu Mirenge 4 ingurube 180, aya matungo akaba yiyongera ku bindi bikorwa birimo gutera ibiti birimo ibivangwa n’imyaka, amashyamba ndetse n’ibiti by’imbuto, ibi biti bikaba byaratewe by’umwihariko ku nkengero z’umuhanda Rugobagoba-Mukunguri ndetse no bindi byanya byari bihari mu Mirenge y’amayaga bidateyeho ibiti.