RUGALIKA: Hatangirijwe ubukangurambaga bwo kuzirika ibisenge by’amazu

Umuyobozi w'Agateganyo w'Akarere ka KAMONYI bwana TUYIZERE Thaddee, uyu munsi yatangije ku rwego rw'Akarere igikorwa cyo kuzirika ibisenge by'amazu mu rwego rwo gukumira Ibiza bya hato na hato byibasira abaturage. Ni gahunda yatangirijwe mu Murenge wa RUGALIKA akagari ka Bihembe mu Mudugudu watujwemo imiryango y'abatishoboye yubakiwe ikuwe mu manegeka n'ahandi hantu hashoboraga gushyira ubuzima bwabo mu kaga.

Muri iki gikorwa hasobanuwe ko ikigamijwe ari ugukora ibishoboka byose abaturage bakumva akamaro ko kuzirika amazu kugira ngo ibisenge bidatwagwa n'umuyaga cyangwa ibindi biza bya hato na hato. Umuyobozi w'Akarere yagize ati" buri mwaka mu Karere kacu ntihabura abantu bapfa bishwe n'ibiza. Ntihabura kandi ibikorwa byangirika bitewe n'ibiza by'imvura birimo n'amazu atwarwa ugasanga ni nayo ahitanye ubuzima bw'abaturage. Ibyo rero tugomba kubikumira hakiri kare kuko niwo muti urambye ku mibereho myiza y'umuturage".

Umuyobozi w'akarere yasabye abaturage kuyobora neza amazi aturuka ku bisenge by'amazu yabo, yabasabye kandi gucukura ibyobo bifata amazi cyangwa se bakagura ibigega bifata amazi yok u nzu kandi ayo mazi bakanayakoresha mu mirimo inyuranye yo mu rugo.

Umunyamabanga Nshingwabikorwa w'Umurenge wa RUGALIKA Mme UMUGIRANEZA Marthe yavuze ko ari iby'agaciro kubona ubuyobozi buhitamo Umurenge abereye Umuyobozi kugira ngo hatangirizwe iyi gahunda. Yashimiye ubufatanye busanzwe buranga abaturage n'ubuyobozi bwabo mu kwikemurira ibibazo, yizeza ko bazakomeza ubwo bufatanye kugira ngo habeho gusenyera umugozi umwe muri uru rugamba rw'iterambere.

Muri iki gikorwa kitabiriwe n'Umuyobozi wa Polisi mu Karere CIP BUGINGO Emmanuel, Umuyobozi wa NISS mu Karere bwana TULIKUMANA Israel, abafatanyabikorwa n'abayobozi ku rwego rw'Akarere; haziritswe inzu zubakiwe imiryango y'abatishoboye batujwe ahantu hamwe mu Mudugudu. Biteganyijwe ko iyi gahunda izakorwa mu Karere hose bityo abaturage bakibutswa kuzirika amazu yabo igihe imvura itari yagwa neza, izasange imirimo yagombaga gukorwa yararangiye.