Mu Murenge wa Nyamiyaga Akagari ka Mukinga niho habereye ku rwego rw’Akarere itangizwa ry’umwaka mushya 2023/2024 w’ubwisungane mu kwivuza. Uyu mwaka watangijwe mu Mirenge yose, ku rwego rw’Akarere yatangijwe  n’Umuyobozi w’Akarere Dr. Nahayo Sylvere. 

MUDAHERANYWA Damascene Umunyamabanga Nshingwabikorwa w’Umurenge wa Nyamiyaga yagaragaje ko ubwitange n’ubufatanye hagati y’abaturage n’ubuyobozi ko aribyo byatumye baba indashyikirwa mu kwishyura mituweri y’umwaka ushize. Yagarutse ku budasa bafite ko ibanga nta rindi ari ukuyoboka ibimina byo kwishyura mituweli, abaturage babigize ibyabo bikaba intsinzi yabo, n’ubutaha bakaba biyemeje kuzaba  indashyikirwa nk’ibisanzwe.

Umuyobozi ufite mu nshingano Mituweri bwana Kabera Innocent, yashimiye abayobozi n’abaturage ko bahesheje ishema Akarere ka Kamonyi  ku rwego rw’Intara bakaba aba mbere , yavuze ko bitamutungura ko baba aba mbere kuko  abahuje imbaraga ntakibananira.

Umuyobozi w’Akarere ka Kamonyi Dr.NAHAYO Sylvere yashimiye Umurenge wa Nyamiyaga, ashimira by’umwihariko abaturage uruhare bagize rwo kwishyura Mituweli ku gihe kandi vuba . Yavuze ko yiteze kuzababona ku mwanya wa mbere. Yavuze ko Umurenge wa Nyamiyaga ugiye kuzagirwa Umurenge w’ikitegererezo abandi bakazajya baza kubasura bakababwira ibanga bakoresheje.

Umuyobozi w’Akarere yaboneyeho umwanya wo gushima ibikorwa by’itorero inkomezabigwi harimo kubaka uturima tw’igikoni, ndetse yibanze ku bindi bikorwa bagiye bakora byo guteza imbere imibereho myiza y’abaturage, ashimira Ababyeyi bohereje abana  ngo bakorere igihugu bikaba byaratumye akarere kaza ku mwanya wa 2 ku rwego rw’Igihugu mu kwesa imihigo y’ibikorwa by’Urugerero.
Twababwira ko Akagari ka Mukinga mu Murenge wa Nyamiyaga, ariko ka mbere mu kwishyura mutuweli 2022/2023 mu Ntara y’Amajyepfo, naho Umurenge wa Nyamiyaga ukaba ari uwa mbere mu Karere ka Kamonyi muri iyi gahunda. Utugari twose tw’uyu Murenge kandi tukaba twarabashije kugera ku kigerereranyo cya 100%.

Mutesire Olive
Internee/UR-Huye Campus