Tariki 30 Ugushyingo 2024, hirya no hino mu Mirenge hakozwe umuganda rusange usoza ukwezi k’Ugushyingo. Umuganda wibanze ku gufata neza ibikorwaremezo by’imihanda, gukumira Ibiza no kubakira abatishoboye.
Mu muhanda uva Bugoba i Rukoma werekeza Kabuga mu Murenge wa Ngamba niho habereye umuganda rusange usoza ukwezi ku rwego rw’Akarere ka Kamonyi. Umuyobozi w'Akarere Dr. Nahayo Sylvere ari kumwe n’Umuyobozi wa Polisi mu Karere Supt. Furaha Fulgence, Umuyobozi w’Inkeragutabara mu Karere Lt. Colonel Eliphaz hamwe n’Umuyobozi wa NISS mu Karere bwana Mutabazi Jean Baptsite  bifatanyije n'abaturage gusiba ibinogo byari byarangije uyu muhanda uva Bugoba ujya Kabuga mu Murenge wa Ngamba.

Mu butumwa bwatanzwe nyuma y'umuganda, Umuyobozi w’Akarere Dr. Nahayo Sylvere abaturage bibukijwe ko ubumwe bwabo arizo mbaraga zabo, bityo bahamagarirwa kwirinda icyo aricyo cyose cyabatandukanya ahubwo bakimakaza imibanire myiza, bakubaka umuryango mwiza kandi umuryango ushoboye unatekanye.
 Hanatanzwe ubutumwa ku isuku n'isukura, kwita ku bantu bafite ubumuga kuko nabo bashoboye no kurwanya ihohoterwa rikorerwa mu muryango. Abitabiriye banibukijwe kugira uruhare ku gukumira ruswa n'akarengane, hatanzwe n’ubutumwa ku mikorere n’imikoranire na BDF, abitabiriye kandi bibukijwe gukomeza ubumwe bwabo kuko arizo mbaraga z’igihugu, bakirinda icyo aricyo cyose cyakurura amacakubiri.
Muri ibi bikorwa by’umuganda, umuyobozi w’Akarere Wungirije Ushinzwe ubukungu Niyongira Uzziel we yakoreye Umuganda mu Murenge wa Runda, naho Umuyobozi Wungirije Ushinzwe Imibereho Myiza Mme Uwiringira Marie Josee yari mu Murenge wa Musambira.