Hirya no hino mu Mirenge yose igize Akarere kimwe n’ahandi mu gihugu, tariki ya 08 Werurwe 2026 habaye ibirori byo kwizihiza umunsi mpuzamahanga w’Umugore.
Ku rwego rw’Akarere ibirori byabereye mu Kagari ka Cyambwe Umurenge wa Musambira, bikaba byitabiriwe n'Abadepite bagize Ihuriro ry'Abagore bari mu Nteko Ishinga Amategeko y’u Rwanda (FFRP) iri tsinda ry’abadepite yari riyobowe na Hon. Depite DEBONNEUR Jeanne d'Arc . Insanganyamatsiko tuzirikana uyu mwaka mu Rwanda ni :" Umugore ni uw'Agaciro ".

I Musambira, iyi gahunda yitabiriwe n’Umuyobozi w’Akarere Dr. Nahayo Sylvere, abagize komite nyobozi y’Akarere (bombi), inzego z’umutekano, abafatanyabikorwa n’abatuye mu Tugari dutandukanye.

Mu Murenge wa Musambira, ibirori byaranzwe no gushimira ababaye indashyikirwa mu guharanira iterambere ry'umuryango . Abana bagaburiwe indyo yuzuye nk'ikimenyetso cyo gukomeza muri uwo murongo wo guharanira imibereho myiza, hari imiryango 63 yorojwe amatungo magufi (ihene) mu Murenge wa Musambira, imiryango 2 ihabwa inka. 

Gahunda yabimburiwe no kumurika ibyo abagore bamaze kwigezaho mu iterambere, hatanzwe matelas n’ibiringiti ku batishoboye mu rwego rwo kubafasha kuba ahantu heza hagendanye n’igihe.