Kuri iki cyumweru mu Karere ka Kamonyi kuri stade ya Ruyenzi, hashoje imikino y'amarushanwa Amashuri Kagame cup. Iyi mikino ya nyuma yahuje amakipe y' ibigo by'amashuri abanza n'ayisumbuye yitwaye neza ku rwego rw'Akarere. Imikino yakinwe ni: Umupira w'amaguru, Rugby, Imikino y'intoki (Volleyball, basketball, handball na Netball).

Iyi mikino ikaba yashojwe hatangwa ibihembo ku makipe y'ibigo by'amashuri yatsinze imikino ya nyuma, ku bufatanye bwa FERWAFA n'ishyirahamwe ry'imikino mu mashuri, hanatanzwe imipira ya football 340 yagabanyijwe ibigo by'amashuri byose mu Karere ka Kamonyi. Hanatanzwe imipira n'ibikoresho bya siporo byatanzwe na federation za siporo zitandukanye zo mu Rwanda.

Umushyitsi mukuru yari Umuyobozi w’Akarere ka Kamonyi Dr. NAHAYO Sylvere wari kumwe n'abagize komite nyobozi y'akarere,  abahagarariye inzego z'umutekano zikorera mu karere ka Kamonyi, uhagarariye ishyirahamwe ry'imikino mu mashuri ku rwego rw'Igihugu, Intumwa ya kimite Olympic mu Rwanda, Intumwa yaje ihagarariye REB, uwaje ahagarariye  MINISPORT,  abahagarariye Federation za sport zitandukanye zo mu Rwanda, abanyamabanga nshingwabikorwa b'Imirenge,  abayobozi b'ibigo by'Amashuri yose yo mu karere ka Kamonyi n'abandi bafatanyabikorwa batandukanye.

Umuyobozi w’Akarere yashimiye inzego zose bafatanyije mu gukurikirana no kuyobora neza iyi mikino, yizeza ko ubwo bufatanye buzakomeza kandi bagaharanira iteka gutwara ibikombe. Yasabye abana gukomeza gukuza impano zabo kuko bafite amahirwe menshi bakesha imiyoborere myiza y’u Rwanda, hashingiwe ku gushyiraho uburyo bwose bufasha urubyiruko gukunda imikino n’imyidagaduro. Buri kipe y'Ikigo cy'ishuri yabaye iya mbere yahawe igikombwe n'imipira ya gukina kandi ikazahagararira Akarere ka kamonyi mu mikino yo ku rwego rw'Intara y'Amajyepfo.