Ku wa 18 Kamena 2025, Umuyobozi w’Akarere Wungirije Ushinzwe iterambere ry’ubukungu bwana Niyongira Uzziel, yakiriye itsinda ryari rije mu bugenzuzi bwo kureba uko imishinga yatewe inkunga ihagaze, ndetse n’icyo ibyo bikorwa byamariye abaturage.

Mu kwakira iri tsinda, yari kumwe n’Umunyamabanga Nshingwabikorwa w’Akarere bwana Bushayija Fred, iri tsinda ryari rigizwe n’impuguke zaturutse mu Kigo KfW-Ikigo Mpuzamahanga cy’Ubudage Gishinzwe gitera Inkunga imishinga y’iterambere ndetse bari kumwe n’abakozi b’Ikigo Gishinzwe gutera inkunga imishinga y’inzego z’ibanze  LODA ari naho iyo nkunga ya KFW inyuzwa kimwe n’izindi nkunga. 

Hakozwe inama ngufi hagaragazwa imwe mu mishanga yakozwe, nyuma hasuwe umuyoboro w’amazi- AEP Kayenzi, Ikigo Nderabuzima cya Kayumbu na Ruhurura yubatswe mu Murenge wa Runda harebwa uko ibi bikorwa bifashwe. 

Muri uru ruzinduko  hari n’itsinda ryaganiriye n'abaturage mu Murenge wa Kayenzi mu rwego rwo kugaragaza imikorere y’umushinga wo gukwirakwiza amazi meza n'inyungu bawukuyemo.