Hirya no hino mu Midugudu igize Akarere ka Kamonyi kuwa 07 Mata 2025 habereye igikorwa cyo kwibuka ku nshuro ya 31 Jenoside yakorewe Abatutsi mu 1994. 

Mu Murenge wa Karama , ku rwibutso rwa Bunyonga rwa Jenoside yakorewe Abatutsi mu 1994, niho hatangirijwe ku rwego rw'Akarere, igikorwa cyo kwibuka ku nshuro ya 31 Jenoside yakorewe Abatutsi mu 1994.

Nkuko byakozwe no mu yindi Mirenge, gahunda yaranzwe no gushyira indabo kumva iruhukiyemo imibiri y’Abazize Jenoside yakorewe Abatutsi mu 1994. Abitabiriye bagejejweho ikiganiro ku mateka ya Jenoside yakorewe Abatutsi mu 1994, ubuhamya bw'uwarokotse Jenoside, ubutumwa bwa Ibuka, abitabiriye banakurikiye kuri Radio ubutumwa bukuru twagejejweho na Nyakubahwa Perezida wa Repubulika y'u Rwanda. 

Twifatanyije n’Umuyobozi w’Akarere Dr. Nahayo Sylvere na bagenzi be bagize Komite Nyobozi y’Akarere, umunyamabanga Nshingwabikorwa w’Akarere, Umuyobozi Wungirije wa Polisi mu Ntara y’Amajyepfo, abagize inama y’umutekano itaguye y’Akarere, Perezida wa IBUKA mu Karere, inshuti n’abavandimwe baje kwifatanya n’abaturage b’Umurenge wa Karama mu gikorwa cyo kwibuka.