Ubwo kuri 30 Ukwakira 2024 hasozwaga ukwezi kwahariwe kwimakaza ubumwe n’ubudaheranwa, Umuyobozi w’Akarere Dr. Nahayo Sylvere yasabye abaturage gukomeza kwimakaza ubumwe bwabo bagaha agaciro ibibahuza, bakamamaganire kure icyo aricyo cyose gishobora kubatandukanya. Iki gikorwa cyanakozwe hirya no hino mu Mirenge, cyitabirwa n’ubuyobozi hamwe n’abaturage.

Mu Kagari ka Bunyonga Umurenge wa Karama, niho hashorejwe ku rwego rw'Akarere ukwezi kwahariwe kuzirikana no kwimakaza ubumwe n'ubudaheranwa bw'abanyarwanda, iyi gahunda ikaba yitabiriwe n’Umuyobozi w’Akarere Dr. Nahayo Sylvere, Umuyobozi wa Polisi mu Karere, Umuyobozi w’Urwego rw’Iperereza mu Karere (NISS) bwana Mutabazi Jean Baptiste, Umuyobozi Mukuru Wungirije wa “Special Guarantee Fund” aricyo Kigega Cyihariye cy'Ingoboka.
-Umuyobozi w’Akarere Wungirije Ushinzwe Ubukungu bwana Niyongira Uzziel iyi gahunda yayitabiriye mu kagari ka Gihara Umurenge wa Runda. Muri uku kwezi hatanzwe ibiganiro binyuranye ndetse n'ibindi bikorwa bigamije gusigasira imibanire myiza.