Kugira ngo habeho kubungabunga igishanga cya Gikora kiri hagati y’Imirenge ya Rukoma, Karama, Kayenzi na Ngamba, abagize inama y’umutekano itaguye y’Akarere tariki 13 Gicurasi basuye abaturage baturiye iki gishanga, babasaba kureka gukomeza gucukuramo bakurikiye amabuye y’agaciro kuko byangiza igishanga bigatuma ubuhinzi bwahakorerwaga buhagarara. 

Abagize inama y’umutekano itaguye y’Akarere bamaze gusura igishanga cya Gikoro ; mu Kagari ka Muganza Umurenge wa Karama , bagiranye inama y’umutekano yatumiwemo abatuye aka Kagari n’Imirenge ihana imbibe nako (Kayenzi, Ngamba na Rukoma) haganirwa by’umwihariko ku gukumira  ubucukuzi bw’akajagari buri gukorerwa mu gishanga cya Gikoro, bukaba bumaze kwangiza ubuso bunini bw’iki gishanga.

 Iyi nama yayobowe n’Umuyobozi w’Akarere Dr. Nahayo Sylvere ari kumwe n’abagize inama y’umutekano itaguye y’Akarere (Umuyobozi wa Polisi mu Karere, Ukuriye urwego rw’Iperereza mu Karere, Ukuriye abinjira n’abasohoka, Umuyobozi wa RIB, umuhuzabikorwa wa DASSO) n’abayobozi b’Imirenge ya Karama, Kayenzi, Rukoma na Ngamba.

Abaturage basabwe gukumira ubu bucukuzi bw’akajagari kuko ari intandaro z’urugomo rwa hato na hato. Basabwe kandi gutangira amakuru ku gihe kugira ngo ibi bikorwa bikumirwe kandi hamwe n’inzego z’umutekano bijejwe ko ubu bucukuzi bugomba guhagarara.