Hirya no hino mu Mirenge yose igize Akarere ka Kamonyi, none habaye ibirori byo gusoza urugerero rw’inkomezabigwi icyiciro cya 12. Inkomezabigwi ni abanyeshuri barangije amashuri yisumbuye, iki cyiciro cya 12 kigizwe n’abarangije mu mwaka w’amashuri wa 2023/2024. 

Mu Kagari ka Kabagesera niho habereye ibirori byo gusoza Urugerero rw'Inkomezabigwi icyiciro cya XII. Iyi gahunda yo ku rwego rw'Akarere yitabiriwe n'intore z'abanyeshuri barangije amashuri umwaka ushize, abaturage, abayobozi n'abafatanyabikorwa b'Akarere. Igikorwa cyo gusoza urugerero, cyaranzwe no gutaha isoko ryubatswe, irerero n'icyumba mpahabwenge mu ikoranabuhanga byubatswe bigizweho uruhare n'urugerero rw'Inkomezabigwi icyiciro cya 12. 

Mu butumwe bukuru bw’umuyobozi w’Akarere Dr. Nahayo Sylvere, yashimiye uruhare rw’Izi ntore mu gutanga umusanzu wabo mu guharanira imibereho myiza y'abaturage. Basabwe gukomeza iryo shyaka ry’urukundo ku gihugu cyabo n’imiryango yabo, kuko nibyo bigaragaza ukwishakamo ibisubizo no kwigira nyakuri. 
Muri iki gikorwa abayobozi batambagiye iri soko ryatangiye kurema, habayeho kugaburira abana indyo yuzuye bibera muri ECD yuzuye, habayeho kandi no kugaragaza ibimaze gukorwa no kugerwaho mu cyumba mpahabwenge.