Kuwa gatandatu tariki 29 Werurwe 2025, hirya no hino mu Karere abaturage n’abayobozi babo bahuriye mu bikorwa by’umuganda rusange usoza ukwezi kwa Werurwe. Ni umuganda wibanze by’umwihariko ku gukora isuku ku nzibutso za Jenoside yakorewe Abatutsi mu 1994 mu rwego rw’imyiteguro yo kwibuka ku nshuro ya 31 Jenoside yakorewe Abatutsi mu 1994. 
Habayeho kandi kurwanya isuri hasiburwa ndetse hacukurwa imirwanyasuri, gufatana neza ibikorwaremezo by’imihanda ndetse no gusibura inzura z’amazi. -Ku rwego rw’Akarere umuganda wabereye mu Kibuza cya Nkingo ku rwibutso rwa Jenoside yakorewe Abatutsi mu 1994 rwa Kamonyi ukaba witabiriwe na Senateri Mugisha Alexis, Umuyobozi w’Akarere Dr. Nahayo Sylvere, Umuyobozi w'Akarere Wungirije Ushinzwe  Imibereho Myiza Mme Uwiringira Marie Josee, abagize inama y’umutekano itaguye y’Akarere, abafatanyabikorwa ba KOICA (Korean International Cooperation Agency) yari ihagarariwe na Uwonkunda Jean Louis hamwe n’abanyeshuri bize muri Korea ku nkunga ya Leta ya KOREA bibumbiye mu ishyirahamwe KORA. 
Ku bufatanye bwa KOICA n’Ibitaro bya Remera Rukoma, muri uyu muganda habayeho gupima abitabiriye umuganda babyifuza indwara zitandura (NCDs) kugira ngo bamenye uko bahagaze.