Tariki 07 Mata 2024, hirya no hino mu Midugudu yose yo mu Mirenge igize Akarere ka KAMONYI, habereye igikorwa cyo kwibuka ku nshuro ya 30 Jenoside yakorewe Abatutsi mu 1994. Ni igikorwa cyaranzwe muri rusange n’ubutumwa bw’ihumure, ikiganiro ku mateka ya Jenoside yakorewe Abatutsi, habayeho kandi no kumva ubuhamya bw’Abarokotse Jenoside yakorewe Abatutsi mu 1994.
Ku rwego rw’Akarere ka Kamonyi igikorwa cyabereye ku rwibutso rwa Jenoside yakorewe Abatutsi mu 1994 rwa Kamonyi rwubatse mu Murenge wa Gacurabwenge. Ubuyobozi bwafatanyije n’inshuti n’abavandimwe gushyira indabo ku mva zishyinguyemo imibiri y’Abatutsi bishwe muri Jenoside yakorewe Abatutsi mu 1994 mu rwego rwo kunamira izi nzirakarengane.
Gahunda yitabiriwe n’Umuyobozi w’Akarere Dr. Nahayo Sylvere na bagenzi be bagize komite nyobozi y’Akarere, V/P wa Ibuka ku rwego rw’Akarere bwana Mucundanyi Robert, abagize inzego z’umutekano mu Karere, abajyanama mu nama njyanama y’Akarere, abafatanyabikorwa n’abatuye muri uyu Murenge wa Gacurabwenge bitabiriye iki gikorwa gitangiza gahunda yo kwibuka.