Ku wa kane tariki 08 Nzeri 2022 ku bufatanye bw'Akarere ka Kamonyi na FXB Rwanda  mu Murenge wa Runda habereye umuhango wo gutanga ibikoresho byo gutangira kwihangira imirimo. Muri uyu muhango Ubuyobozi bw'Akarere bwari buhagarariwe na bwana NIYONGIRA Uzziel Umuyobozi w'Akarere Wungirije Ushinzwe iterambere ry'ubukungu, FXB Rwanda  yari ihagarariwe na bwana KAYITANA Emmanuel Umuyobozi wa FXB mu Rwanda.

Nkuko bwana KAYITANA Emmanuel umuyobozi wa FXB yabitangaje, ngo ibi bikoresho byahawe  abana batandukanye barimo abana babangavu babyariye iwabo bakaba ariko barafashijwe kwiga imyuga, abana bafite imibereho yabashyira mu ngorane zo kwandura SIDA. Aba bana b’abakobwa bize imyuga itandukanye harimo: kudoda, gusuka imisatsi n’ibindi. Aba bana bahawe ibikoresho bitandukanye bizabafasha guhanga ubuzima birimo: imashini zidoda16 zisanzwe, imashini 4 za sulfurage, ibitenge byo gutangirana, ameza, ipasi n'ibiringiti byo kugororeraho ibyadozwe/imyenda, ibikoresho byifashishwa mu gusuka imisatsi: fauteilles, casque, tondeuses, meshe, intebe, amabasi, amavuta, essui mains ndetse n’ibikoresho by’isuku.

Umuyobozi w’Akarere Wungirije Ushinzwe ubukungu bwana NIYONGIRA Uzziel, avuga ko bazakomeza kuba hafi aba bana kugira ngo bazarusheho gutera imbere. Mu mpanuro ze, yabasabye kwirinda gupfusha ubusa aya mahirwe babonye yo guhabwa ibikoresho by’ibanze ngo bihangire umuliro. Yabibukije ko bakwiye kwihatira gukora cyane kuko ari ibyo bizatuma batera imbere bakirinda ubunebwe bagakora nk’abikorera koko. Yongeye gusaba aba bana b’abakobwa kureka ingeso, abibutsa ko ubuzima bwabo buri mu maboko yabo ko nta wundi muntu uzaza kubitaho ataribo ubwabo, bityo abasaba gufata neza amagara yabo.

Abahawe ibi bikoresho bashimiye umuryango FXB bizeza ko ibyo bungukiye mu gukorana n’uyu mufatanyabikorwa bizaba imbarutso yo kurushaho kwiteza imbere no kwikura mu bukene ngo kandi baratangiye kuko hari aho bamaze kwigeza. Uwavuze mu izina rya bagenzi be yasabye ubuyobozi kurushaho kubafasha bakabona amasoko y’ibyo bakora. Yavuze ko nk’abadozi baba bakeneye ibyo badoda ko bibona isoko ngo ariko hari igihe bikorwa ugasanga kubera kutagira isoko rigari ntibungutse nkuko babyifuza. Asaba rero ko ubuyobozi bwabafasha kubona amasoko kuko ibyo bakora ari byiza kandi bihendutse.