Mu bukangurambaga bwakozwe kuwa 11 Ugushyingo 2025, Polisi y’Igihugu ku bufatanye n’Intara y’Amajyepfo basabye abagenzi n’abatwara ibinyabiziga kwigengesera, bagakurikiza amategeko bityo bakagira uruhare mu kwirinda impanuka. 

Ni gahunda yabereye mu Murenge wa Runda ikaba yari igamije kwibutsa uruhare rwa buri wese (abatwara ibinyabiziga n'abanyamaguru) mu gukumira impanuka zo mu muhanda, bufite insanganyamatsiko igira iti "TURINDANE, TUGEREYO AMAHORO". 

Igikorwa cyitabiriwe na Guverineri w’Intara y’Amajyepfo Mme KAYITESI Alice,’itsinda riyobowe n’Umuyobozi wa Polisi Wungirije Ushinzwe Ibikorwa CP Vincent SANO, n’umuyobozi w’Ingabo ku Ntara. 

Bakiriwe n’Umuyobozi w’Akarere Wungirije Ushinzwe Ubukungu bwana NIYONGIRA Uzziel, Umuyobozi w’Akarere Wungirije Ushinzwe imibereho myiza Mme Uwiringira Marie Josee hamwe n’abagize inama y’umutekano itaguye y’Akarere. 

Mu butumwa bwe, Umuyobozi wa Polisi Wungirije Ushinzwe Ibikorwa Commissioner of Police SANO Vincent yavuze ko impanuka nyinshi ziterwa n'amakosa akorwa n'abatwara ibinyabiziga, rimwe na rimwe banyoye, abagira umuvuduko uretse urugero, abatwara bafite umunaniro ndetse hari n'abajya mu muhanda bataramenya ibinyabiziga. Yavuze ko Polisi icyo ishinzwe mbere na mbere ari ukwigisha, ariko iyo binaniranye hitabazwa itegeko abantu bagahanwa.

Guverineri w'Intara y'Amajyepfo Mme Kayitesi Alice, we yavuze ko Leta ihora iteka ishishikajwe no kugeza ibikorwaremezo hirya no hino by'imihanda kugira ngo bifashe mu migenderanire kandi mu buryo bwiza. Yashimangiye ko imihanda igenda ikorwa mu Ntara ayoboye, ndetse ngo hari n'iyagurwa kugira ngo bizafashe mu gutwara abantu n'ibintu hirindwa impanuka. Yongeyeho ko imihanda yashyizweho amatara ndetse n'itaracanirwa gahunda irahari kandi bizakorwa.