Ubwo yari mu nama n’abayobozi mu nzego zitandukanye mu Mirenge ya Mugina na Rukoma kuri uyu wa gatanu tariki 19 Mutarama 2024, Guverineri w’Intara y’Amajyepfo Mme Kayitesi Alice yasabye buri muyobozi kumva ko gutanga serivisi nziza biri mu nshingano ze kandi ari mu nyungu z’umuturage n’igihugu muri rusange.

Ibi biganiro byabereye mu Mirenge ibiri ariyo Rukoma na Mugina ahahuriye abakuru b’Imidugudu, abakuriye inkeragutabara mu Tugari no mu Mirenge, abagize urwego DASSO, abayobozi b’Ibigo by’amashuri, abayobozi b’ibigo nderabuzima, abanyamabanga Nshingwabikorwa b’Imirenge n’ab’Utugari n’abafatanyabikorwa b’Imirenge. Uyu munsi kuri izo site zombi hasuwe abayobozi bo mu Mirenge ya Mugina,Nyamiyaga, Rukoma,Ngamba na  Gacurabwenge.

Muri ibi biganiro, Umuyobozi w’Intara y’Amajyepfo yibukije aba bayobozo ko bafite inshingano no kwita ku mibereho myiza n'iterambere ry'umuturage mu ngeri zitandukanye no gufatanya nawe mubikorwa bya buri munsi. Yasabye kandi aba bayobozi gukomeza kubumbatira umutekano no kwakira neza abaje babagana  bityo bakimakaza ihame ry’ imiyoborere myiza no gukorera mu mucyo.

Umuyobozi wa Polisi mu Ntara y'Amajyepfo ACP Desire M.Twizere yasabye aba bayobozi bitabiriye ibi biganiro, kugira uruhare mu gukumira icyaha icyo aricyo cyose kitaraba, hagamijwe gusigasira umutekano kuko ariwo shingiro ry'iterambere n’imibereho myiza buri muntu yifuza kugera.

Umuyobozi w'Ingabo mu Ntara y'Amajyepfo Maj. General Vincent Gatama mu nama n'aba bayobozi b'inzego z'ibanze, yasabye buri muyobozi kurushaho kurangwa n'imyitwarire myiza no kwegera umuturage bakamufasha mu iterambere rye.  

Ku ruhande rw’abitabiriye iyi nama, nabo basanga yari ingirakamaro kuko bahungukiye byinshi bizabafasha mu kurushaho kunoza imiyoborere yabo. Uhoranimana Jean Jacques Roger umunyamabanga Nshingwabikorwa w’Akagari ka Kazirabonde mu Murenge wa Ngamba yagize ati” ubu iyi nama idusigiye umukoro wo gukosora ibyaba bitagenda neza aho tuyobora kandi tugafasha koko umuturage gukomeza gutera intambwe, tugafatanya na we, tugatanga serivisi nziza kuko ariwo musingi w’imiyoborere myiza”.

Iyi nama yabereye kuri site 2 yanitabiriwe n’Umuyobozi w'Urwego rw'Inkeragutabara mu Ntara n’abandi bagize inama y’umutekano itaguye y’Intara n’Inama y’umutekano itaguye y’Akarere. Ku ruhande rw’ubuyobozi bw’Akarere, kuri site ya Rukoma iyi nama yitabiriwe n’Umuyobozi w’Akarere Dr. NAHAYO Sylvere naho Umuyobozi w’Akarere Wungirije ushinzwe iterambere ry’ubukungu ubukungu bwana Niyongira Uzziel yari muri ibi biganiro mu Murenge wa Mugina.