Ku Biro by'Akarere ka Kamonyi kuwa 27 Gicurasi 2022 hateraniye inama yahuje abayobozi b'amakoperative yose mu Karere, abayobozi ba Komisiyo y'Ubukungu mu Ihuriro ry'abafatanyabikorwa mu iterambere n'Ubuyobozi bw'Akarere buhagarariwe na V/M Ushinzwe ubukungu bwana Niyongira Uzziel.

Haganiriwe ku bikorwa Akarere kakoze mu mwaka w'imihigo 2021-2022 n'ibiteganyijwe gukorwa mu mwaka wa 2022-2023; Ubukangurambaga ku muhigo wa Ejo Heza ugamije gushishikariza abaturage kwizigamira by’igihe kirekire. Abari mu nama banaganiriye kuri gahunda y’imurikabikorwa, basabwa gukora ubukangurambaga mu kuzitabira imurikabikorwa n'imurikagurisha rizaba mu kwezi kwa 6 rikazaba kuva kuwa 08-18 Kamena 2022.

Mu nama banaganiriye ku mikorere y'inzego za Koperative, Imiyoborere n'imicungire y'umutungo, uruhare rw'abafatanyabikorwa mu iterambere ry'amakoperative, gukemura ibibazo bibangamiye imibereho myiza y'abaturage (Human Security issues). Ku musozo w’iyi nama, abayobozi b'amakoperative basinye Imihigo ikubiyemo intego z'ibyo bazageraho mu nkingi y'Ubukungu, iy'imibereho myiza y'abanyamuryango b'amakoperative n'iy'imiyoborere myiza.