Nkuko bisanzwe ku mugoroba wo ku wa kabiri buri cyumweru, kuri uyu wa kabiri tariki 14 Ukuboza 2021 mu Tugari twose inteko z’abaturage zateranye. Ni ibiganiro byahuje abayobozi n’abaturage haganirwa ku ishyirwamubikorwa rya gahunda za Leta by’umwihariko izikenewe ubukangurambaga, hakiriwe kandi hakemurwa ibibazo byashyikirijwe ubuyobozi.

Muri iyi gahunda, Umuyobozi w’Akarere Wungirije Ushinzwe iterambere ry’ubukungu bwana NIYONGIRA Uzziel yitabiriye inteko mu Murenge wa Nyamiyaga mu nama yabereye mu Mudugudu wa Sabununga, Akagari ka Mukinga. Umuyobozi w’Akarere Wungirije Ushinzwe Imibereho Myiza Mme UWIRINGIRA M. Josee  we yari mu Murenge wa Gacurabwenge mu nteko yabereye mu Mudugudu wa Mataba Akagari ka Nkingo, Umunyamabanga Nshingwabikorwa w’Akarere bwana Emmanuel BAHIZI yitabiriye iyi gahunda mu Murenge wa RUGALIKA mu nama yabere mu Kagari ka Masaka.

Muri rusange, abitabiriye inama baganiriye ku ngingo zinyuranye zirimo gukomeza kubahiriza amabwiriza yo gukumira icyorezo cya Covid-19. Mu Murenge wa Gacurabwenge, VM Ushinzwe Imibereho Myiza yabwiye abaturage ko kubahiriza amabwiriza yo gukumira Covid-19 ari ingenzi kuko nibyo bizatuma ubuzima bukomeza gusubira mu buryo nkuko byahoze. Yasabye abaturage kujya bubahiriza guhana intera aho bateraniye ari benshi mu gihe cya ngombwa, kandi bakazirikana ko kwambara neza agapfukamunwa ari intwaro ikomeye yo gukumira Covid-19. Yasabye kandi abaturage gukomeza umuco mwiza wo gukaraba amazi meza n’isabune cyangwa bagakoresha umuti wabugenewe wo gusukura intoki. Ubuyobozi bwasabwe kuzirikana buri gihe uburyo bufasha abaturage kwirnda Covid-19, hashyirwaho ibyangombwa nkenerwa igihe byabaye ngombwa ko bahuriza hamwe abantu ariko hubahirijwe amabwiriza ariho muri iki gihe tugihanganye n’icyorezo.

 By’umwihariko, abaturage basabwe kwitabira igikorwa cyo gukungira Covid-19, kuko ni uburyo bwiza kandi bwizewe bwo kongerera umubiri ubwirinzi kuri iyi ndwara nubwo bidakuraho gukomeza ingamba zo kwirinda covid-19 zisanzwe, ahubwo kwikingiza bifasha umuntu wakingiwe kutazahara igihe yanduye iki cyorezo bityo ubuzima bwe bugahorana ubudahangarwa. Abaturage bibukijwe ko inking zo gukingira zihari ku bantu bafite nibura imya 18 y’ubukure gusubiza hejuru, asaba buri wese kwitabira no kubwira mugenziwe akajya kuri site zateganyijwe hirya no hino mu Mirenge akikingiza.