Ku biro by'Akarere i Gihinga mu Murenge wa Gacurabwenge kuwa 24 Kamena 2022 habereye igikorwa cyo kwibuka ku nshuro ya 28, abari abakozi bakoreraga amakomini yahujwe akavamo Akarere ka Kamonyi bazize Jenoside yakorewe Abatutsi mu 1994. Abo ni abakozi 19 bakoreraga amakomini ya Runda, Taba, Mugina, Kayenzi, Musambira na Rutobwe bishwe bazira uko baremwe, bishwe ko bazira ko ari Abatutsi.
Iyi gahunda yitabiriwe na Visi Perezida w'Inama Njyanama y'Akarere bwana Ngirinshuti Fidèle, Umuyobozi w'Akarere Dr NAHAYO Sylvere, Umunyamabanga Nshingwabikorwa w'Akarere, Umuyobozi w'umuryango CARSA  bwana Nkinzingabo Christophe ,  Perezida wa IBUKA mu Karere bwana BENEDATA Zacharie, abagize inzego z'umutekano, Abanyamabanga Nshingwabikorwa b'Imirenge, Abakozi bakorera ku Karere, abayobozi b'Utugari, abo mu miryango y'abakozi twibuka uyu munsi, inshuti n'abavandimwe baje kwifatanya n'abakozi kwibuka.

Mu butumwa bwe, Umuyobozi w’Akarere ka Kamonyi Dr. Nahayo Sylvere yibukije ko gukumira Jenoside ari inshingano za buri wese. Yasabye abakozi gukomeza kugira uruhare mu kurwanya ingengabitekerezo ya Jenoside kandi bakabitoza abaturage bayobora kugira ngo imbuto y’urwango iranduke burundu mu muryango nyarwanda. Ashingiye mu mateka y’igihugu, Umuyobozi w’Akarere yavuze ko nk’abakozi bakwiye gutekereza ubuzima abakozi bagenzi babo bazize Jenoside bakoreragamo mu gihe cy’ubutegetsi bubi bitanga ishusho y’imibereho mibi, gutotezwa bazira ubwoko bwabo. Yagize ati “iyo tubibuka ni umwanya wo kubasubiza icyubahiro bambuwe, ni umwanya wuko tuzirikana ubwitange bagiraga bikatubera urugero rwiza rwo gukora cyane kugira ngo dutange umusaruro mwiza n’umusanzu ufatika ku gihugu cyacu”.

Fidele NGIRINSHUTI Visi Perezida w’Inama Njyanama y’Akarere mu butumwa bwe bw’umunsi yasabye abakozi b’akarere gukomeza kurangwa n’urukundo bakimakaza imibanire myiza bityo bakabera urugero abo bashinzwe kuyobora aribo baturage. Yashimangiye ko mu gihe twunze ubumwe ari zo mbaraga zacu nk’abanyarwanda mu gukumira Jenoside n’ingengabitekerezo ya Jenoside.