Abahinzi bashyikirijwe ifumbire bagenewe na Leta nta kiguzi mu rwego rwo kongera umusaruro by’umwihariko muri iki gihe uturere tumwe na tumwe twugarijwe n’izuba muri iki gihe ubundi hagwaga imvura y’umuhindo ubu yabaye nkeya.

Kuri uyu 01 Ugushyingo 2022, mu gishanga cya Gikoro giherereye hagati y’Imirenge ya Karama na Rukoma, abaturage n’abanyamuryango ba Koperative COAMALEKA bari kumwe n’ubuyobozi bafatanyije gutera ifumbire ya DAP & UREA ku gihingwa cy’ibigori bihinze ku buso bwa 85ha. Gutera ifumbire bigamije gufasha igihingwa gukura gitohagiye bityo ukaba wizeye ko umusaruro uziyongera. Gutera ifumbire byahujwe no kuvomerera hifashishijwe imashini zunganira uburyo bwa gakondo mu rwego rwo guhangana n’ikibazo cy’izuba.

Iki gikorwa cyitabiriwe na Minisitiri w’Ubuhinzi n’ubworozi Mme MUKESHIMANA Geraldine, Guverineri w’Intara w’Intara y’Amajyepfo Mme KAYITESI Alice, Umuyobozi w’Akarere ka Kamonyi, Umuyobozi w’Ingabo Mu Ntara y’Amajyepfo, Umuyobozi wa Polisi Wungirije mu Ntara y’Amajyepfo n’abandi mu nzego z’umutekano ku Ntara no mu Karere; n’abafatanyabikorwa banyuranye.

Minisitiri Mukeshimana Geraldine, avuga ko nubwo izuba ryava umuhinzi atagomba kujya mu nzu ngo yiyicarire ategereze ko imvura izagwa, ko ahubwo asabwa gukora ibishoboka byose ngo abana batamusonzana birimo kuhira imyaka mu bishanga aho abarizwa mu makoperative. Hari kandi kureba n’utundi turimo yakora twatuma urugo rwe rutagira ikibazo bityo izuba ntiribe ikibazo na gito ku rugo rwe.

Minisitiri w’ubuhinzi n’ubworozi yongeye ko Leta izakomeza kwita ku buhinzi ashimira cyane abahinzi bo mu Karere ka Kamonyi muri rusange kubera ko igihe cyose usanga bashishikajwe no kwita ku bikorwa byabo bya buri munsi ibyo bigatuma barushaho gutera imbere. Yishimiye kandi ibigori byiza bishishe biri mu gishanga cya Gikoro, avuga ko bitanga icyizere rwose ko umusaruro uzaba mwiza.