Kuwa gatandatu tariki 20 Nzeri mu Mirenge yose habaye umuganda wihariye w'abagore, umuganda ukaba wabereye ku rwego rw'Akagali witabirwa n'ibyiciro bitandukanye barimo abaturage mu byiciro bitandukanye; abahagarariye inzego z’Inama y’Igihugu y’Abagure (CNF) ku Mudugudu, Akagali, Umurenge n'Akarere; Abayobozi ku nzego bwite za Leta n’abafatanyabikorwa. 

Ku rwego rw'Akarere umuganda wabereye mu kagali ka Gihinga witabirwa n’Umuhuzabikorwa w'Inama y'Igihugu y'Abagore ku rwego rw'Akarere Madame MUSABYIMANA Marie Goretti, uhagarariye Amakoperative ku Ntara, Madamu UWIZEYIMANA Christine, umukozi w'Akarere ushinzwe Uburinganire n’iterambere ry'Umuryango Madame UMUHOZA Alexia, Umuhuzabikorwa w'Inama y'Igihugu y'Abagore ku rwego rw'Umurenge Madame UMUHOZA Pacifique bakiriwe n'Umunyamabanga Nshingwabikorwa w'Akagari ka Gihinga.

Hirya no hino hakozwe ibikorwa byo kubaka imirima y'igikoni no gutera ibiti by'imbuto; kubaka no gusana inzu ku batishoboye; gusana ubwiherero; kurwanya isuri hatunganywa umuhanda.

Nyuma y’ibikorwa by’amaboko habaye ibiganiro byibanze ku kurwanya amakimbirane; kurwanya imirire mibi no gukumira ko abana bata ishuri.