Kuva tariki 15-16 Ukwakira 2023, Abadepite bo mu Nteko Ishinga Amategeko muri Komisiyo y'Ubumwe bw'Abanyarwanda, Uburenganzira bwa Muntu no Kurwanya Jenoside aribo Hon.Pie NIZEYIMANA na Hon.UWAMARIYA RUTIJANWA Marie Pelagie bamaze iminsi ibiri mu Karere muri gahunda igamije kureba Imibereho y’Abarokotse Jenoside yakorewe Abatutsi batishoboye na Serivise bagenerwa uko bazigezwaho, uko ibimenyetso n’ubuhamya bw’abarokotse Jenoside bibungabunzwe, aho amateka ya Jenoside yakorewe Abatutsi mu 1994 ageze yandikwa.

Aba badepite bagiranye inama n’ubuyobozi bw’Akarere kuri izo ngingo, ibiganiro byitabiriwe  n’Umuyobozi w’Akarere Dr. NAHAYO Sylvere’ abagize inama y’umutekano itaguye y’akarere, abahoze mu buyobozi bw’Akarere n’ibyari amakomini kuva 1995, abanyamabanga Nshingwabikorwa b’Imirenge, abagize inzego za Ibuka ku Karere no mu Mirenge.
Nyuma y’iyi nama basuye urwibutso rw’Abazize Jenoside yakorewe Abatutsi mu 1994 rwa Kamonyi, banagiranye ikiganiro n’abagenerwabikorwa ba MINUBUMWE batuye mu Murenge wa Gacurabwenge.