Tariki 29 Gicurasi 2026 ku cyicaro cy’Akarere i Gihinga mu Murenge wa Gacurabwenge, habereye igikorwa cyo kwibuka abahoze ari abakozi b’amakomini yahujwe akabyara Akarere ka KAMONYI ari yo Komini Runda, Taba, Mugina, Kayenzi, Musambira na Rutobwe bazize Jenoside yakorewe Abatutsi mu 1994. 
Gahunda yaranzwe n’ubutumwa bwo kwihanganisha abarokotse Jenoside yakorewe Abatutsi mu 1994, hatanzwe ikiganiro ku mateka ya Jenoside, abitabiriye banagejejweho ubuhamya bw’uwarokotse Jenoside. 
Igikorwa cyashojwe no gushyira indabo kuri “Monument” yubatse ku biro by’Akarere  iriho amazina y’Abakozi bakoreraga amakomini bazize Jenoside; mu rwego rwo kwibuka aba bakozi no kubaha icyubahiro. 

Umushyitsi mukuru yari Dr. NAHAYO Sylvere Umuyobozi w’Akarere, hari kandi abajyanama mu Nama Njyanama y’Akarere, Komite Nyobozi y’Akarere, Perezida wa Ibuka mu Karere bwana Benedata Zacharie, abagize inzego z’umutekano, abafatanyabikorwa, abakozi b’Akarere bahagarariye abandi baje kwifatanya n’abagize imiryango y’abo twibuka uyu munsi muri iki gikorwa cyo kwibuka Abakozi bakoreraga amakomini.